Nekt og axir hjá löggunni

Lögregla höfuðborgarsvæðisins fær margvísleg verkefni, þeirra á meðal var hún kölluð til til að gá að hálfþrítugum sem sagt var að gengi um klæðalítill í miðbæ Reykjavíkur.  Þegar að var komið reyndist maðurinn kviknakinn og í annarlegu ástandi. Þá gerði lögreglan upptækar þrjár axir í bíl ungs manns í gær.

17 ára ökumaðurinn var stöðvaður við hefðbundið umferðareftirlit í Breiðholti. Í bíl hans fundust þrjár axir sem ökumaðurinn átti erfitt með að gera grein fyrir og voru þær því haldlagðar.

Eftirlit var haft með útvistartíma barna og unglinga í gærkvöld. Flestir virða útivistarreglur en þó ekki allir. Lögreglumenn höfðu afskipti af níu ára stúlku sem var í söluturni í Kópavogi um tíuleytið. Aðspurð sagðist hún hafa verið send út í sjoppu af móður sinni. Samkvæmt útivistarreglum má þessi stúlka ekki vera á almannafæri eftir klukkan 20:00 nema í fylgd með fullorðnum. Henni var ekið til síns heima en móðir hennar lofaði því að þetta myndi ekki endurtaka sig. Þá var bíll stöðvaður í Kópavogi um hálfþrjúleytið í nótt en á meðal farþega var 14 ára stúlka. Hún átti að vera löngu komin í háttinn og gat gefið lítt haldbærar skýringar á þessari útivist. Haft var samband við foreldra hennar en þeir óskuðu þess að hún kæmi heim til sín hið fyrsta og lögreglan varð að sjálfsögðu við því.