Óttast að sæði valdi bólum

Frönsk fyrirsæta segir að Tony Parker, maður Evu Longoriu, hafi haldið framhjá eiginkonunni aðþrengdu með sér. Hún heldur því fram að Parker hafi verið pirraður á því að Eva væri ekki hrifin af ákveðnum kynlífathöfnum.

Alexandra Paressant sagði við slúðurvefinn x17online að hún hefði verið gestur í brúðkaupi hjónanna í júlí. Þar hefði Parker byrjað að gefa henni auga. Stuttu síðar kynnti sameiginlegur vinur þeirra, fótboltamaðurinn Thierry Henry, þau.

Í lok september byrjuðu þau að skiptast á klúrum smáskilaboðum, þegar Parker dvaldi einn á Park Hyatt hótelinu í París. Þar sváfu þau saman allar næturnar þangað til Parker fór aftur til eiginkonunnar í Bandaríkjunum skömmu síðar. Mánuði síðar heimsótti Paressant hann svo í Texas.

,,Hann sagði að Eva vildi ekki gera ákveðna hluti í kynlífi" sagði Paressant. ,,Hún vill ekki elskast fyrir framan spegil, er ekki hrifin af ákveðnum stellingum, og heldur að hún fái bólur af sæði." Fyrirsætan sagði einnig að Parker hefði gifst Evu vegna þess að ,,allir verði að gera það einhverntímann", en hann væri ennþá ungur og vildi leika sér.

Talsmaður Longoriu sagði söguna uppspuna frá rótum. Algengt væri að frægt fólk yrði fyrir ásökunum sem þessum, og þetta væri ekki í fyrsta sinn sem Paressant væri staðin að því að bulla í fjölmiðla.

Fyrirsætan komst í heimsfréttirnar í fyrra eftir að Ronaldinho, þáverandi kærasti hennar, fór í mál við hana fyrir að selja slúðurblöðum fréttir af partýstandi fótboltakappans kringum heimsmeistaramótið í fótbolta.