Cohen kveður Borat og Ali G.

Breski leikarinn Sacha Baron Cohen hefur ákveðið að segja skilið við tvær af frægustu persónum sínum, rapparann Ali G og fréttamanninn Borat. Þetta kemur fram í viðtali við leikarann í breska blaðinu Daily Telegraph sem er eitt af fáum viðtölum undanfarin ár þar sem hann situr sjálfur fyrir svörum en ekki einhver af persónum hans.

Þar segir Cohen að persónunar tvær, sem hafa orðið ódauðlegar í bæði þáttum og kvikmyndum, séu svo vinsælar að það hamli honum sjálfum töluvert. „Þegar ég var Ali G. eða Borat var í ég hlutverkunum í allt að 14 tíma á sólarhring. Ég hef haldið mikið upp á þá en það er sorglegt að segja frá því að ég mun aldrei leika þá aftur," segir Cohen.

Aðdáendur Cohens þurfa þó ekki að örvænta því hann leikur nú í myndinni Sweeny Todd. Þar fer hann með hlutverk Pirellis, rakarans syngjandi, sem Todd drepur. Enn fremur er væntanleg mynd með austurrísku tískulöggunni Bruno, þriðju persónunni sem Cohen gerði fræga í Da Ali G. Show.