Súperman verður heimilislaus

Ofurhetjan elskaða, Súperman, missir á næsta ári möguleikann á því að skipta um föt og bjarga heiminum, en þá lokar síðasti símaklefinn í Bandaríkjunum.

Símafyrirtækið AT&T lokar á næstunni síðasta símaklefanum sínum. Stóraukin farsímaeign hefur gert klefana góðu óþarfa, og nú er svo komið að fyrirtækinu finnst hreinlega orðið of dýrt að halda þeim úti.

Enn eru um milljón símaklefar í Bandaríkjunum, töluverð fækkun frá því sem var fyrir tíu árum, þegar þeir voru 2.6 milljónir talsins. Áramótin 2008/9 verður þeim síðasta lokað. AT&T er síðasta fyrirtækið til að loka klefum sínum, en áður höfðu Bellsouth og Verizon tilkynnt að þau væru hætt með klefana.