Blindur keyrir risajeppa

Atvinnubílstjórinn Einar Lee var að aka bíl sínum þann 17. júní árið 2000 þegar hann hnerraði, og missti sjónina. Við hnerrann fór blóð yfir bæði augu og Einar vissi að þetta yrði síðasta ökuferðin hans. Hann var þá 29 ára gamall, og hefur verið blindur síðan.

Stuttu eftir slysið fór Einar í tölvunám og vinnur nú við hljóðvinnslu á Blindrabókasafninu. Hann hefur þó alltaf dreymt að geta keyrt aftur. Hann er gestur Sirrýjar í Örlagadeginum í kvöld, en hún fékk Emil Grímsson framkvæmdastjóra Arctic Trucks í lið með sér til að láta drauminn rætast. Emil útvegaði leyfi og eitt stykki átta milljón króna Landcruiser jeppa og svo héldu þau í ökuferð með einar Lee undir stýri.

Það var ekki auðsótt að fá leyfið, en hafðist fyrir rest, enda var ökuferðin farin á bílabraut og öruggir leiðbeinendur með í för. Sirrý segir að ferðin hafi gengið vel, þó henni hafi ekki verið alveg sama þegar hún steig upp í bílinn. ,,Ég bað hann að lofa mér að aka ekki hratt, var svolítið hrædd þegar ég var að fara upp í bílinn." sagði Sirrý. Eftir þennan langþráða ökutúr nötraði Einar og skalf, enda stressaður að keyra um á margra milljóna eðaljeppa. Bílferðina sögulegu má sjá í Örlagadeginum, sem er á dagskrá Stöðvar 2 í kvöld klukkan 20.20.