Britney stelur hárkollu í hjálpartækjaverslun

Britney spears toppaði sjálfa sig á dögunum þegar starfsfólk hjálpartækjaverslunar bannaði henni að máta nærföt sem hún hafði augastað á. Starfsfólkið sagði Britney að það leyfði ekki mátun á nærfötum af hreinlætisástæðum. Söngkonan var síður en svo hress með það, og skellti sér úr nærbuxunum fyrir framan hóp af steinhissa viðskipavinum búðarinnar.

,,Hún brjálaðist, fór úr nærfötunum í miðri búðinni fyrir framan fimmtán viðskiptavini og mátaði svo nærföt með ,,Barely Legal" saumað á rassinn." sagði einn viðstaddra við US Weekly tímaritið. Starfsfólk búðarinnar bað Britney í sífellu að máta fötin ekki frammi í búð, en hún svaraði því til að hún hefði ekki mátt fara með þau inn í búningsklefa. ,,Þetta var eins og að eiga við barn." sagði heimildamaðurinn, og bætti því við að Britney hafi litið út fyrir að vera undir áhrifum lyfja. Britney greiddi að lokum fyrir nærurnar með kreditkorti og þaut út, og reif hárkollu af einni gínunni á leiðinni.