Draugar Milos Forman

Goya`s Ghost, nýjasta kvikmynd hins tékkneska Milos Forman, verður meðal kvikmynda á Bíódögum Græna ljóssins sem hefjast eftir tæpa viku. Myndin segir frá ævi spænska málarans Francisco Goya og er stjörnum prýdd en meðal leikara eru þau Natalie Portman og Javier Bardem auk Stellan Skarsgaard sem fer með hlutverk Goya.

Sjö ár eru liðin síðan Milos sendi frá sér sína síðustu mynd, Man on the Moon, þar sem Jim Carrey fór hamförum í hlutverki bandaríska grínarans Andy Kaufman. Yfirleitt ríkir mikil spenna í kringum kvikmyndir Milos sem gerði meðal annars Gaukshreiðrið og Ríkið gegn Larry Flynt og má ljóst vera að aðdáendur Forman eiga eftir að bíða spenntir eftir nýjustu afurð hins aldna höfðingja.

Græna ljósið tilkynnti í gær um fjórar aðrar kvikmyndir sem verða á dagskrá Bíódaga og þar ber ef til hæst hin vægast sagt umtalaða kvikmynd Shortbus sem olli töluverðri hneykslan þegar hún var sýnd á Cannes fyrir opinskáar kynlífssenur. Þá má einnig nefna Cocaine Cowboys en það er heimildarmynd um þá eiturlyfjabylgju sem skall á Miami við upphaf níunda áratugarins og varð síðar meir að fyrirmynd kvikmynda á borð við Scarface og Miami Vice.