Vill síður vera borinn berrassaður út úr Kringlunni

Egill Einarsson, betur þekktur sem Gillzenegger, ætlar næstkomandi Þorláksmessu að standa við gefin loforð og hlaupa nakinn í gegnum Kringluna. ,,Jújú, ég fer þarna í gegn berrassaður á öðru hundraðinu" sagði Gillz þegar Vísir heyrði í honum.

Tímasetningin á sínar skýringar. ,,Ég vil gera þetta þegar sem flestir eru í Kringlunni " segir Gillzenegger, sem segist með þessu í raun vera að gera góðverk. ,, Það er mikið stress í fólki á þessum tíma, þetta lífgar kannski upp á daginn."

Gillz hefur örlitlar áhyggjur af lögfræðihlið málsins, enda er það almennt ekki vel séð að menn séu berrassaðir í Kringlunni. ,,Ég þarf að ræða þetta við lögfræðinginn minn." segir Gillz. ,,Vil síður láta handjárna mig og bera mig berrassaðan út úr Kringlunni"

Nektin flokkast lagalega undir ósæmilega hegðun á almannafæri. Hjá Lögreglunni í Reykjavík fengust þær upplýsingar að nakið fólk á almannafæri væri undantekningarlaust fjarlægt ef lögregla hefði á annað borð hendur í hári þeirra.

Kringlan er ekki auðveld yfirferðar á Þorláksmessu, jafnvel þó fólk ætli sér einungis að rölta í gegnum hana í hægðum sínum. Gillz segist ekki óttast að mannflaumurinn hægi á honum. Vissulega gæti þetta orðið vandamál, en hann sé þó bæði fimur og snöggur. ,,Ég hleyp hundraðið á ellefu komma einni, ég held ég eigi ekkert í vandræðum með að smeygja mér á milli fólks"

Forsaga málsins er sú að Gillzenegger skrifaði á blogginu sínu að ef Garðar Örn Hinriksson knattspyrnudómari, sem Gillz vill meina að hafi horn í síðu Breiðabliks, dæmdi liðinu víti myndi hann hlaupa nakinn í gegnum Kringluna. Daginn eftir dæmdi Garðar Breiðabliki einmitt víti. Þetta finnst Gillz einkennileg tilviljun en stendur þó við stóru orðin. ,,Ég væri til í að hlaupa þetta með honum." segir Gillz. Bara við tveir félagarnir að skokka gegnum kringluna."