Fékk meldingar og ræddi ekki Palestínu

Valgerður Sverrisdóttir utanríkisráðherra segist ekki hafa séð tilgang í því að ræða samskipti Íslands og Palestínu í ríkisstjórn Íslands þar sem hún hafi fengið „ákveðnar meldingar úr forsætisráðuneytinu.“

Valgerður segir „athyglisvert“ að Geir H. Haarde forsætisráðherra útiloki ekki í samtölum við fjölmiðla að koma á slíkum samskiptum. Ef gefið sé í skyn að það eina sem hindri framgang málsins sé að það hafi ekki verið tekið upp í ríkisstórn, verði slíkt einfaldlega gert. Ríkisstjórnarfundir séu stopulir í kosningabaráttunni en Valgerður heitir því að ræða málið þar fyrir kosningar.

Geir H. Haarde forsætisráðherra sagði á blaðamannafundi á fimmtudag að hann vildi fara varlega í málið. „Ég get bara sagt það að þetta hefur ekki verið rætt í ríkisstjórn og ef það ætti að taka einhverja nýja stefnu í þessu þá þyrfti slíkt mál að ræða þar og síðan í utanríkismálanefnd. En það er auðvitað hverjum frjálst að segja það sem honum finnst. Það er bara ekki tímabært að taka afstöðu til þess.“

Um frumkvæði Norðmanna, að koma á stjórnmálasambandi við Palestínumenn, ein Evrópuþjóða, segir Geir þá gjarnan fara sínar eigin leiðir í utanríkismálum. „Enda eru þeir gerendur á svo mörgum sviðum. [...] Það skiptir máli á svæðinu hvað þeir gera,“ segir Geir. Afstaða Íslands skipti minna máli.

Leiðtogar stjórnarandstöðuflokkanna eru sammála hugmynd um utanríkisráðherra.

ngibjörg Sólrún Gísladóttir, Samfylkingunni, telur fulla ástæðu til þessa og segir það matsatriði hver ástundi hryðjuverk og hver hernað á þessu svæði. „Væri farið eftir því ættum við ekki að hafa samband við neinn af þessum deiluaðilum fyrir botni Miðjarðarhafs.“

Steingrímur J. Sigfússon, VG, er „algjörlega sammála“ og telur að „Norðmenn eigi heiður skilið að sýna þann kjark að taka upp samskipti við Palestínumenn“.

Guðjón Arnar Kristjánsson, Frjálslynda flokknum, segir „sjálfgefið“ að styðja tillögu Valgerðar, svo fremi sem það geti orðið til þess að styðja við friðarferlið í Mið-Austurlöndum. „Ég held að við eigum akkúrat að nota utanríkisþjónustuna til að hafa áhrif til friðar í heiminum.“

Ómar Ragnarsson í Íslandshreyfingu telur „eðlilegt að við höfum samskipti við bæði Palestínumenn og Ísraela, það sé „eina leiðin sem er fær út úr klemmunni á svæðinu“.