Höfðingleg jólagjöf Baltasars

„Þetta lítur vel út. En samt er enginn ofsagróði af Mýrinni eins og hjá bönkunum,“ segir leikstjórinn Baltasar Kormákur aðspurður um hvort Mýrin reynist ekki sannkölluð gullnáma.

Baltasar tók sig til og gaf öllum þeim sem störfuðu við Mýrina, tökuliði, eftirvinnsluliði, helstu aðstandendum og leikurum þeim sem ekki voru sérstaklega yfirborgaðir, hundrað þúsund krónur í jólagjöf. Um er að ræða rúmlega þrjátíu manns þannig að þessi rausnarlega gjöf hefur kostað Baltasar og fyrirtæki hans rúmar þrjár milljónir.

„Þegar vel gengur þá er rétt að deila því með fólkinu sínu,“ segir Baltasar sem þó vill ekki tala mikið um þessa jólagjöf, eða bónusgreiðslu, né hreykjast af rausn sinni. En vissulega mættu fyrirtæki sem gengur vel taka sér þetta til fyrirmyndar.

Fréttablaðið greindi nýverið frá því að Mýrin hefði slegið aðsóknarmet síðan mælingar hófust en síðast þegar fréttist höfðu 84 þúsund manns séð myndina. Ætla má að tekjur af sýningum myndarinnar, brúttó tekjur, séu um níutíu milljónir. Að auki hlaut Mýrin 45 milljónir í styrk frá Kvikmyndasjóði þannig að myndin stendur undir sér og vel það. Og ekki er séð fyrir endann á tekjumöguleikum því Mýrin hefur verið seld til Þýskalands og Skandinavíu. Ekki er þó byrjað að sýna hana þar enn.

„Við erum að búa okkur undir það. Þetta fer allt í gang nú fljótlega. Sýningar og frekari sala.“