Náttúrufræðikennsla á bókstaflegri siglingu

Rúmlega þúsund grunnskólabörn fá að sigla um Sundin í vor, veiða skelfisk og fræðast um lífríki hafsins, þökk sé samstarfssamningi sem undirritaður var á Miðbakka Reykjavíkurhafnar í morgun.

Samstarfsverkefnið "sjóferð um Sundin" er hluti af náttúrufræðikennslu ellefu og tólf ára barna á höfuðborgarsvæðinu, á Akranesi og í Borgarnesi. Siglingarnar og fræðsla þeim tengd eru samstarf Faxaflóahafna, Fjölskyldu- og húsdýragarðsins og Háskóla Íslands. Ýmsar rannsóknir fara fram í ferðunum, selta og hitastig sjávar eru mæld. Svo er kastað út botnsköfu og aflinn grandskoðaður: ígulker, skelfiskur og fleiri furðudýr. Nemendurnir vinna svo verkefni úr því sem þau lærðu og sáu í ferðinni, auk þess sem margir bekkjanna fara einnig í fjöruferðir, þar sem fræðslurit sem börnin fá, nýtist þeim vel.

Verkefnið hefur gengið með einhverjum hætti síðan árið 1989, en æ fleiri skólar og bekkir taka þátt á hverju ári. Alls fara 53 sjöttu og sjöundu bekkir í siglingu í vor, milli þúsund og ellefu hundruð nemendur.