Glamúrinn víkur fyrir hverdagsleikanum

Tíska og förðun haldast ávallt vel í hendur og þar sem glamúrinn tónast niður þetta árið og hversdagsleikinn verður allsráðandi í fatatískunni gildir það sama um förðunina. Glansandi húð og sólar­púður í miklum mæli víkur fyrir púðri og vínrauðum kinnum.

Nú er allt í einu komið í tísku að vera hvítur í framan, klakabúum til mikillar ánægju, enda eru endalausar brúnkumeðferðir tímafrekar, svo ekki sé minnst á ljósabekkina sem eru hættulegir í þokkabót.

Breiðar augabrúnir eru helsta einkenni gruggtískunnar frá tíunda áratugnum og helst eiga þær að vera úfnar og miklar. Glimmer fær að víkja fyrir maskara og svörtum blýanti. Fjólubláir tónar í augnskuggum ásamt svörtum og dökkbrúnum, því hin margrómaða „smokey“-förðun verður aðalmálið í vetur.