Iðrast gjörða sinna

Stórleikarinn og leikstjórinn Mel Gibson hefur beðist afsökunar á framferði sínu en hann var sem kunnugt er handtekinn fyrir að vera ölvaður undir stýri. Gibson barðist við áfengissýki á upphafsárum sínum í Hollywood en tók á sínum málum þegar ferillinn var kominn í hættu. Hann frelsaðist síðan í kaþólsku kirkjunni og er meðlimur í mjög strangtrúum söfnuði innan hennar.

Samkvæmt talsmanni Gibsons hefur hann nú skráð sig í meðferð en ekki virðast öll kurl komin til grafar. ABC sjónvarpsstöðin hefur hætt við að framleiða sjónvarpsþætti um helför gyðinga sem Gibson hafði í smíðum eftir að leikarinn lét hafa eftir sér niðrandi ummæli um gyðinga þegar handtakan var gerð. Talsmaður sjónvarpsstöðvarinnar vildi þó sem minnst gera úr málinu og sagði einfaldlega að ekkert handrit hefði sést í rúm tvö ár og því hefði verkefnið verið blásið af. Hins vegar vildi Ari Emanuel, áhrifamikill um­boðsmaður í Hollywood, að kvikmyndaframleiðendur sniðgengju hugmyndir Gibsons. "Leikarinn getur ekki leyft sér að segja slíka hluti án þess að taka afleiðingunum," skrifaði hann á Huffington Post-blogginu.

Ummæli Gibsons koma á versta tíma því stjórn Ísraels hefur legið undir ámælum vegna átakanna í Líbanon. Gibson hefur áður þurft að takast á við gagnrýni frá samfélagi gyðinga í Bandaríkjunum en kvikmyndin The Passion of the Christ sem Gibson leikstýrði var harðlega fordæmd þar sem hún þótti ganga einum of langt í að sýna sök gyðinga á dauða Jesú Krists.

Lögreglan í Malibu gaf frá sér yfirlýsingu um málið á mánudag en þar kom fram að Gibson hefði játað sig sekan á staðnum og að lögreglan hefði sýnt honum tilhlýðilega virðingu. Lögreglumaðurinn James Mee, sem handtók Gibson, sá sig meðal annars tilneyddan til að gefa frá sér yfirlýsingu þar sem hann vonaðist til að handtakan myndi ekki skaða Gibson á neinn hátt. "Ég vona bara að leikarinn setjist ekki aftur undir stýri þegar hann hefur drukkið áfengi," sagði Mee.