Hollywood ekki fyrir homma

Leikarinn Rupert Everett er orðinn leiður á hræsninni í Hollywood og þeim fordómum sem eru í garð samkynhneigðra í kvikmyndaiðnaðinum.

Þetta kemur fram í nýrri sjálfsævisögu hans, Red Carpets and Other Banana Skins, þar sem hann lætur allt flakka.

Hollywood er tálsýn, segir Everett og bætir því við að kvikmyndastjörnur séu loftbólur sem vilji ekkert segja og megi heldur ekki segja neitt. Þeim sé borgað fyrir að halda kjafti. Svo virðist sem allt sé að verða hraðara, grimmarara og ógnvænlegra, sérstaklega í skemmtanabransanum. Það er verið að skemmta okkur svo mikið að það er eiginlega ómögulegt fyrir okkur að hugsa um nokkuð annað. Það eina sem heldur dampi í fréttunum dag frá degi er rassinn á Jennifer Lopez, segir hann.

Everett, sem er 47 ára, segist jafnframt vera orðinn of gamall til að vera á markaðnum sem samkynhneigður maður. Enginn vill mig. Hommar og konur eiga eitt sameiginlegt, bæði verða ósýnileg við 42 ára aldurinn. Hver vill ástarsamband með fimmtugum homma? Enginn, það get ég sagt þér, segir hann. Ég gæti kveikt í mér á hommabar og fólk myndi bara kveikja í sígarettunum sínum á mér.

Ritstjóri sjálfsævisögunnar, Antonia Hodgson, segir að bókin eigi eftir að koma fólki í opna skjöldu. Þetta er ekki bara enn ein bókin frá þekktri persónu, segir hún. Hann lætur ekki allt flakka um einhverja eina manneskju heldur vill hann frekar sýna hvernig frægðin getur farið með fólk.

Í bókinni segir Everett meðal annars frá gagnkynhneigðum ástarsamböndum sínum með Paula Yates, eiginkonu Bob Geldof, frönsku leikkonunni Beatrice Dalle og leikkonunni Susan Sarandon. Skrifar hann líka m.a. um kynni sín af Andy Warhol, Orson Welles, Bob Dylan og Donatella Versace.

Everett er vafalítið þekktastur fyrir hlutverk sitt í My Best Friend"s Wedding. Einnig hefur hann m.a. leikið í Another Country og ljáð prinsinum fagra rödd sína í Shrek 2.