Garðabær kaupir vatn frá Kópavogi

Bæjarstjórar Garðabæjar og Kópavogs undirrita á morgun samning um að Garðabær kaupi allt að 2 milljónum tonna af vatni á ári til íbúa sinna og fyrirtækja frá Vatnsveitu Kópavogs, frá og með fyrri hluta árs 2007. Þetta kemur fram í tilkynningu frá upplýsingastjóra Garðabæjar.  

Bæjarstjórarnir undirrita á sama tíma viljayfirlýsingu um uppbyggingu á sameiginlegu hesthúsasvæði við Kjóavelli þar sem gert er ráð fyrir að sameinað hestamannafélag Gusts og Andvara hafi aðstöðu.

Vatnið sem Garðabær kaupir frá Kópavogi, samkvæmt samningnum, kemur frá borholum í landi Vatnsenda en þar fyrirhugar Vatnsveita Kópavogs að taka vatnsveitu í notkun á fyrri hluta árs 2007. Um leið er stefnt er að því að leggja niður vatnsveitu í Dýjakrókum í Garðabæ í áföngum frá árinu 2008 til ársins 2010. Sveitarfélögin munu vinna saman að tillögu að breyttri skilgreiningu á vatnsverndarsvæðum, samkvæmt svæðisskipulagi fyrir höfuðborgarsvæðið, í samræmi við þessar breytingar á vatnsöflun.

Samningurinn nær til ársloka 2047 og er óuppsegjanlegur af hálfu Kópavogs til þess tíma. Garðabær greiðir 3,44 kr. fyrir hvern rúmmetra á tímabilinu 2007-2017. Á tímabilinu 2018-2027 greiðir Garðabær 6,08 kr. fyrir rúmmetra og 8,10 kr. á árunum 2028-2047.

Bæjarfélögin lýsa jafnframt yfir vilja sínum til að vinna í sameiningu að

því að skipuleggja hesthúsasvæði og athafnasvæði fyrir hestamenn á

Kjóavöllum, en breytingar á vatnsvernd gera slíka uppbyggingu fýsilega.

Gert er ráð fyrir að hestamannafélögin Gustur í Kópavogi og Andvari í

Garðabæ sameinist og byggð verði upp mannvirki á Kjóavöllum sem verði

aðstaða hins nýja félags.

Gunnar Einarsson, bæjarstjóri í Garðabæ segir mikinn ávinning vera af

samningnum fyrir Garðbæinga. "Með því að semja um kaup á vatni frá

Vatnsveitu Kópavogs, sem ætlar að fara í mikla uppbyggingu í

Vatnsendakrikum, er Garðbæingum tryggt nægt og gott vatn til framtíðar. Ég tel að samningurinn sé hagstæður fyrir Garðabæ og við náum með honum að tryggja öryggi í vatnsöflun á mjög sanngjörnu verði. Um leið er ánægjulegt að hægt sé að byggja upp enn glæsilegri aðstöðu fyrir hestamenn í landi Garðabæjar og tryggja þeim æfinga- og keppnissvæði eins og best gerist."

Gunnar Birgisson, bæjarstjóri í Kópavogi er einnig ánægður með samninginn en með honum er hestamönnum í Kópavogi og Garðabæ tryggð framtíðaraðstaða á góðum stað þar sem sveitarfélögin tvö mætast. "Með samningnum er náð afar góðri nýtingu á verðmætu landi á höfuðborgarsvæðinu sem er öllum til hagsbóta auk þess að með samningnum er skotið traustari stoðum undir fyrirhugaða vatnsveitu Kópavogs."

Samningurinn verður undirritaður í félagsheimili Andvara á Kjóavöllum kl.

17 á morgun, föstudaginn 19. maí.