Lífeyrissjóðirnir sem sveiflujöfnun

Davíð Oddsson Seðlabankastjóri var gestur á aðalfundi lífeyrissjóða og fór þar yfir stöðu efnahagsmála. Hann staldraði þar við sterka stöðu lífeyrissjóðanna og fjárfestingar þeirra innanlands sem utan. Hann sagði lífeyrissjóðina verða að fara varlega á innlendum hlutabréfa- og lánamarkaði svo þeir misbeittu ekki stöðu sinni.

Seðlabankastjóri telur fjárfestingar lífeyrissjóðanna erlendis geta haft jákvæð áhrif á gengi krónunnar. Hann telur að lífeyrissjóðirnir geti dregið úr gengissveiflum vegna þess hvernig þeir stýra fjárfestingum sínum erlendis. Hann sagði lífeyrissjóðina fjárfesta erlendis þegar krónan væri sterk og selja útlendar eignir þegar krónan væri veik. Þannig væri ákveðin sveiflujöfnun fyrir krónuna í erlendum fjárfestingum lífeyrissjóðanna.