Sýnir ógöngur málsins

"Þessi niðurstaða sýnir í hvers konar ógöngum saksóknari er með málið og niðurstaðan er auðvitað jákvæðar fréttir," segir Jón Ásgeir Jóhannesson, forstjóri Baugs, um niðurstöðu héraðsdóms í Baugsmálinu í gær.

Hann bendir á að þetta sé í annað sinn sem þessum fyrsta lið sé vísað frá. Jón Ásgeir segir að þarna hafi verið um viðskipti að ræða þar sem lá fyrir hvað Baugur væri að kaupa. "Við keyptum verslunarkeðju og borguðum það sem við áttum að borga og fengum það sem við áttum að fá. Síðan fer saksóknari að blanda einhverjum fasteignum inn í þetta sem komu þessum viðskiptum ekkert við og reynir að skjóta á eitthvert verð á þeim, án þess að teikna upp hvernig þetta er saman sett."

Jón Ásgeir segist alltaf hafa búist við því að þessi ákæruliður félli sér í hag, þó að honum yrði ekki vísað frá dómi. "Þetta sýnir bara hvernig málatilbúnaðurinn er. Það er með ólíkindum að þessum lið skuli vísað frá í annað sinn."

Jón Ásgeir segist ekki hafa áhyggjur af framhaldi málsins. "Það hefur enginn tapað neinu og ég sé ekkert í þessu máli. Við munum sanna sakleysi okkar í þeim þáttum sem eftir eru í málinu. Það er hins vegar þungt í manni eftir þetta allt og það er þungt í þjóðinni. Fólk vill ekki að það sé hægt að fara svona með þegnana í landinu."

Jón Ásgeir segir að það sýni að embættismannakerfið sé afmyndað, að málinu sé sífellt haldið áfram. Hann segir engan vafa á því að þetta mál sé af pólitískum rótum. "Það er bara sannað með tölvupóstunum sem Fréttablaðið birti. Síðan hefur Björn Bjarnason tekið við kyndlinum og haldið málinu heitu inni í embættismannakerfinu. Síðan hafa ákveðnir embættismenn lagt sjálfa sig að veði í málinu og með ólíkindum að þeir skyldu ekki fara þegar málinu var vísað frá dómi á sínum tíma." Hann segir þá niðurstöðu hafa verið skömm fyrir embætti ríkislögreglustjóra.