Tveir menn í gæsluvarðhaldi vegna árásar í Heiðmörk

Tveir menn hafa verið úrskurðaðir í gæsluvarðhald til 30. maí vegna gruns um frelsissviptingu og alvarlega líkamárás í Heiðmörk um helgina. Dómarinn frestaði úrskurði um gæsluvarðhald yfir þriðja manninum til klukkan ellefu í fyrramálið. Lögreglan í Kópavogi óskaði í dag í Héraðsdómi Reykjaness eftir gæsluvarðhaldi yfir þremur ungum mönnum sem grunaðir eru um líkamsárás og mannrán í Garðabæ á laugardagskvöld.

Hinir grunuðu gáfu sig allir fram við lögregluna í Kópavogi í dag, Sá fyrsti fyrir hádegi. Lögreglan hafði síðan símasamband við hina tvo sem í kjölfarið gáfu sig fram í sitt hvoru lagi, annar um hádegið og hinn um klukkan tvö. Mennirnir voru yfirheyrðir fram eftir degi hjá lögreglunni sem í framhaldinu óskaði eftir gæsluvarðhaldi vegna rannsóknarhagsmuna.

Mennirnir eru grunaðir um að hafa numið mann á brott af heimili hans í Garðabæ á laugardagskvöld, ekið með hann upp í Heiðmörk og gengið í skrokk á honum. Sá sem fyrir árásinni varð liggur enn á sjúkrahúsi og mun ekki vera úr allri lífshætti en æðar í kviðarholi hans gáfu sig í árásinni. Allir hinir grunuðu eru innan við tvítugt og hafa allir komið við sögu lögreglunnar áður.