Umhverfisráðherra jákvæður í garð friðunar Langasjós

Sigríður Anna Þórðardóttir, umhverfisráðherra, segir vel koma til greina að Langisjór verði friðaður og að hann komi hugsanlega inn í stækkaðan Vatnajökulsþjóðgarð í framtíðinni. Landsvirkjun hefur sýnt stöðuvatninu áhuga með það fyrir augum að veita hluta Skaftár þar í gegn.

Að sögn ráðherra er Langisjór ekki inni í fyrstu áætlun um stækkaðan Vatnajökulsþjóðgarð, sem mun í endanlegri mynd ná yfir 15.000 ferkílómetra svæði, eða tæp 15 prósent af flatarmáli Íslands. Endanleg mörk hafi hins vegar ekki verið dregin og hugsanlegt sé að Langisjór verði tekinn inn í þjóðgarðinn í framtíðinni.

Landsvirkjun hefur gert rannsóknir í Skaftá og Langasjó, með það fyrir augum að beina hluta Skaftár í Langasjó og veita svo vatni úr Langasjó yfir í Tungnaá, þannig nýtist betur virkjanirnar í Tungnaá, Sigalda, Hrauneyjafoss og Sultartangi. Þessar áætlanir hafa verið kynntar fyrir íbúum héraðsins en engin ákvörðun hefur verið tekin um framkvæmdir og þær hafa ekki enn verið sendar í umhverfismat, sem er forsenda framkvæmda.