Huddlestone endurnýjar við Tottenham

Hinn gríðarlega efnilegi miðjumaður Tottenham, Tom Huddlestone, hefur skrifað undir nýjan fjögurra- og hálfs árs samning við Lundúnarliðið og þar með bundið enda á allar vangaveltur um að hann yfirgæfi herbúðir félagsins. Huddlestone hefur spilað mjög vel í vetur og fengið verðskuldaða athygli stóru liðana í Englandi.

Huddlestone er aðeins 19 ára gamall en er þrátt fyrir það lykilmaður í liði Tottenham. Honum er spáð glæstri framtíð í Englandi og telja margir að í honum búi framtíðarmiðjumaður enska landsliðsins.

“Ég er mjög ánægður með þennan nýja samning. Ég nýt hverrar einustu mínútu hjá Tottenham,” sagði Huddlestone við undirskriftina.

Martin Jol, stjóri Tottenham, var ekki síður ánægður. “Tom er einn efnilegasti leikmaður sem komið hefur upp í Englandi í langan tíma. Að leikmaður með þessa möguleika skuli hafa skuldbundið sig í svo langan tíma eru frábærar fréttir fyrir félagið,” sagði Jol.