Hargreaves er ekki að skapa sér vinsældir

Karl-Heinz Rummenigge, yfirmaður knattspyrnumála hjá Þýskalandsmeisturum Bayern Munchen, hefur varað enska landsliðsmanninn Owen Hargreaves við sífelldum yfirlýsingum sínum um að hann vilji fara til Manchester United.

Stutt er síðan Hargreaves lét enn og aftur hafa það eftir sér í fjölmiðlum að hann óskaði þess að ganga í raðir enska liðsins, þrátt fyrir ítrekaðar aðvaranir Rummenigge.

"Staða okkar hefur ekkert breyst. Hann fer ekki fet og hann er sannarlega ekki að eignast nýja vini hjá félaginu með þessum yfirlýsingum," sagði Rummenigge, sem um daginn hótaði leikmanninum bókstaflega öllu illu ef hann léti ekki af óskum sínum.