Baptista vill spila meira

Julio Baptista, brasilíski sóknarmaðurinn sem kom til Arsenal í haust frá Real Madrid, kveðst ósáttur með að fá ekki fleiri tækifæri í byrjunarliði liðsins. Baptista hefur fengið að spila afar lítið síðan hann kom til Arsenal og aðeins skorað eitt mark í vetur.

"Ég veit að ég get spilað mjög vel og hjálpað liðinu til að ná betri úrslitum. Ég fæ bara ekki tækifærið," sagði Baptista ósáttur í samtali við Sky-fréttastöðina.

Brasilíumaðurinn segist binda vonir við að hann fái tækifæri í leiknum gegn Porto í Meistaradeildinni í vikunni þar sem Thierry Henry er í leikbanni. "Ég er ekki meiddur, í fínu formi og þarf að sanna mig fyrir stjóranum. Ég þarf að spila meira og koma ferli mínum hér hjá Arsenal af stað."