Patrick Berger til Stoke City

Enska 1. deildarliðið Stoke City hefur fengið Patrick Berger að láni frá Aston Villa næstu sex vikurnar. Berger er fyrrum landsliðsmaður Tékklands en hefur lítið fengið að spreyta sig með Villa síðan hann gekk í raðir liðsins.

Hjá Stoke spilar Berger væntanlega með fyrrum félaga sínum Salif Diao hjá Liverpool og núvernadi félaga sínum Lee Hendrie hjá Villa. Berger er 33 ára gamall og skoraði 18 mörk í 40 leikjum fyrir landslið Tékka í stuttri sögu þjóðarinnar.

Þá hefur fyrrum enski landsliðsmaðurinn Ugo Ehiogu gengið í raðir Leeds sem lánsmaður fram í janúar, en sá er samningsbundinn Middlesbrough. Þessir samningar voru undirritaðir skömmu fyrir lokun lánsgluggans í enska boltanum, en nú verða engin félagaskipti leyfð á Englandi fyrr en í janúar - hvorki lánssamningar né kaup og sölur.