Savage verður frá í allt að mánuð

Miðjumaðurinn Robbie Savage hjá Blackburn gæti orðið frá keppni í allt að einn mánuð eftir að meiðsli hans á læri tóku sig upp á ný í Evrópuleiknum við Basel í gærkvöld. Savage varð upprunalega fyrir meiðslunum í deildarleik gegn Bolton um daginn.

"Þetta eru sömu meiðsli og ég átti við í leiknum gegn Bolton. Ég var orðinn fínn á æfingum en það er allt annað að spila leiki og um leið og ég byrjaði að hamast í gær fann ég stingandi sársauka," sagði Savage.

"Ég hef verið heppinn með meiðsli allan minn feril, en ætli sé bara ekki komið að mér núna," sagði þessi umdeildi knattspyrnumaður sem leikur með landsliði Wales.