Gísli Súrsson laðar að ferðamenn

Gísla saga Súrssonar laðar erlenda ferðamenn af og til á Vestfirði. Þeir vilja sjá Einhamar þar sem kappinn barðist með iðrin úti. Vestfirðingar sjá þarna tækifæri til að byggja upp sögutengda ferðaþjónustu.

Nú falla vötn öll til Dýrafjarðar, er ein frægasta setning Gísla sögu Súrssonar en hana sagði Vésteinn fóstbróðir hans og mágur á Gemlufallsheiði þegar ekki varð aftur snúið. Meginsögusviðið er þó Haukadalur en þar byggði Gísli bæ sinn, undir hæsta fjalli Vestfjarða, Kaldbaki. Þarna er sagan enn í dag ljóslifandi út um allt. Í fjöruborðinu er seftjörnin fræga þar sem Gísli og félagar iðkuðu ísknattleik að vetri, og tókust hart á.

Í Haukadal urðu mannvíg sem leiddu til þess að Gísli var gerður útlægur. Hann flúði í Geirþjófsfjörð, þar átti hann sér fylgsni og þar var hann loks veginn á klettinum Einhamri eftir hetjulegan bardaga með iðrin úti, sem hann girti fyrir með reipi áður enn hann rak sverðið í höfuð næsta manni og kleif niður til beltisstaðar.

Þórir Örn Guðmundsson á Þingeyri, áhugamaður um Gíslasögu, segist finna fyrir miklum áhuga á Gísla Súrssyni, bæði hérlendis og erlendis. Flest íslensk börn lesi söguna í skóla og nokkur dæmi séu um að hún sé einnig kennd í skólum erlendis, svo sem í Noregi og Þýskalandi. Þessa dagana sé til dæmis bandarískur prófessor á ferð um Vestfirði til að kynna sér söguslóðir í Geirþjófsfirði og Haukadal. Þá er ekki langt síðan hópur norskra kennara gerði sér sérstaka ferð á söguslóðir Gísla.

Það eru fleiri en Dýrfirðingar sem gætu gert sér mat úr Gísla Súrssyni því að sagan teygir sig suður á Barðaströnd og út í Breiðafjarðareyjar. Þar gerðist eitt eftirminnilegasta atriði sögunnar þegar Gísli brá sér í gervi Ingjaldsfíflsins í Hergilsey og villti þannig um fyrir óvinum sínum á flóttanum.