Viðræður hefjast að nýju um Landsvirkjun

Viðræður um kaup ríkisins á eignarhlut Reykjavíkurborgar og Akureyrarbæjar í Landsvirkjun eru að hefjast að nýju. Vilhjálmur Þ. Vilhjálmsson borgarstjóri vonast til að borgin selji fyrir haustið.

Viðræður um að ríkið eignist hluti sveitarfélaganna tveggja í Landsvirkjun hófust formlega fyrir hálfu öðru ári en þeim var hætt í byrjun þessa árs. Nú hefur verið ákveðið að taka upp þráðinn að nýju. Vilhjálmur segir að það gangi ekki lengur í breyttu samkeppnisumhverfi á raforkumarkaði að Reykjavíkurborg sé 95% eignaraðili að Orkuveitu Reykjavíkur og 45% eignaraðili að Landsvirkjun. Óeðlilegt sé að borgin sé báðu megin við borðið. Þessvegna eigi hún að selja og nýta fjármunina til að lækka skuldir.

Verðmiði upp á 60 milljarða króna var kominn á Landsvirkjun í heild þegar upp úr viðræðum slitnaði í vetur. Vilhjálmur telur unnt að ganga til samninga á grundvelli þess tilboðs og í raun hafi lítið borið á milli. Það hafi hins vegar legið ljóst fyrir að ekki var samstaða innan meirihluta R-listans. Jafnvel þótt borgin hefði fengið helmingi hærra tilboð frá ríkinu ætluðu vinstri grænir aldrei að taka þátt í sölu fyrirtækisins. Þannig að viðræður sem fóru fram í tæpt ár voru bara sýndarviðræður.

Vilhjálmur vonast til að viðræðum ljúki sem fyrst og helst fyrir haustið.