Greiningardeild Glitnis mælir með KB banka

Greiningardeild Glitnis hefur uppfært verðmat sitt á KB banka. Verðmatsgengi á KB banka hefur verið lækkað úr 1.014 í 979 kr. á hlut. Í ljósi verðmatsins mælum við með að fjárfestar kaupi bréf í KB banka. Ráðgjöf okkar til skemmri tíma er að markaðsvoga bréfin í vel dreifðum eignasöfnum sem taka mið af íslenska markaðinum. Í ráðgjöfinni felst að við höfum trú á að bréf KB banka muni skila áþekkri ávöxtun og markaðurinn í heild horft til næstu 3-6 mánaða.

Helsta ástæða lækkunar á verðmatinu er að ávöxtunarkrafan hækkar úr 10,6% í 11,1% frá síðasta verðmati. Hagnaður KB banka er áætlaður mun hærri á árinu 2006 en í síðasta verðmati. Útlánaaukning er mun meiri og sömuleiðis eru hreinar þóknunartekjur talsvert hærri en áður var gert ráð fyrir. Útlánavöxtur á næstu þremur árum er þó nokkru lægri en áður áætlað og reiknað er með að bankinn bindi í framtíðinni hlutfallslega minna fjármagn í hlutabréfum.