Menntaskemmtigarður í Laugardalnum

Í dag var undirritaður samningum um þróun Fjölskyldu- og húsdýragarðsins. Reykjavíkurborg hefur breytt deiliskipulagi Laugardalsins og eru framtíðarplönin sú að standa fyrir uppbyggingu á svæðinu sem miðar að því að byggja upp svæði sem verði einskonar "menntaskemmtigarður" en þetta kemur fram í tilkynningu frá Húsdýragarðinum.

Á nýja svæðinu sunnan garðsins sem þessi þróunarsamningur fjallar um er gert ráð fyrir að rísi hús sem hýsi vísindagarð, sjávardýrasafn, Imax sýningarhús, kvikmyndasali, fræðsluaðstöðu, starfsmannaaðstöðu, sýningarsali fyrir ýmis konar sýningar, leiksvæði, húsnæði fyrir dýr og margs konar annars konar þjónustu.

Í dag er engin vafi um að Fjölskyldu- og húsdýragarðurinn er fjölsóttur viðkomustaður fjölskyldufólks en hingað til hafa þarfir yngstu kynslóðanna verið í brennidepli. Tillögurnar sem komnar eru fram varðandi nýtingu nýja svæðisins hafa það að markmiði að skapa kjarna í tengslum helstu staði Laugardalsins þannig að í honum myndist heildstætt svæði menntunar, skemmtunar, líkamsræktar og íþróttaviðburða og sýninga í hjarta Reykjavíkur. Svæði sem dregur að fólk á öllum aldri.

Samstarfsaðilar við Reykjavíkurborg í þessu verkefni eru: Palomar Pictures í eigu Sigurjóns Sighvatssonar, Eignarhaldsfélagið Fasteign hf. og Klasi hf. fasteignafélag. Þessir aðilar skiluðu sameiginlegum tilögum til Reykjavíkurborgar um þróun og uppbyggingu Menntaskemmtigarðs. Á grundvelli þeirra tillagna hefur Reykjavíkurborg ákveðið að ganga til samstarfs við þá um frekari þróun á grundvelli tillagnanna.

Með þessari undirritun er stigið fyrsta skrefið í þá átt að hrinda þessum hugmyndum af stað. Stefnt skal að því að samningum um framkvæmdir, uppbyggingu og leigi sé lokið fyrir janúarlok 2007 enda liggi þá fyrir samþykkt skipulag.