Framsóknarflokkurinn vill sérstakan Kópavogsstrætó

Framsóknarflokkurinn í Kópavogi vill halda áfram að lækka dagvistargjöld og koma á fót sérstökum Kópavogsstrætó. Oddviti B-listans segist ekki leggja áherslu á að Framsóknarflokkurinn endurheimti bæjarstjórastólinn í Kópavogi.

Þetta kom fram á kynningarfundi Framsóknarflokksins í Kópavogi, fyrir kosningarnar um þarnæstu helgi, sem haldinn var á kosningaskrifstofu flokksins við Digranesveg í dag. Einnig stefnir flokkurinn að því að minnka álögur á bæjarbúa á komandi kjörtímabili, lækka fasteignagjöld og greiða niður æfingagjöld vegna íþróttaiðkunar barna og unglinga allt að 18 ára aldri. Aðspurður hvort þetta þýði ekki að nauðsynlegt sé að draga saman á einhverjum sviðum rekstursins segir Ómar Stefánsson, oddviti B-listans í Kópavogi, svo ekki vera. Bærinn hafi enda verið eitt best rekna sveitarfélag landsins.

Framsóknarmaður sat á bæjarstjórastóli í Kópavogi í rúm fjórtán ár, eða frá því Sigurður Geirdal tók við embættinu árið 1990 og gegndi því þar til hann féll frá árið 2004. Spurður hvort framsóknarmenn þyrsti ekkert í að fá mann úr sínum röðum í embætti bæjarstjóra að nýju segir Ómar svo ekki vera. Þeir hafi enda ekki haft neitt bæjarstjóraefni þegar Sigurður varð bæjarstjóri fyrir 16 árum. Aðalatriðið sé að gera bæinn betri.