Fólk hvatt til að skrá neyðarnúmer í farsíma sína

Hvernig er hægt að sjá til þess að þeir fyrstu á vettvang slyss viti í hvaða aðstandendur þeir eiga að hringja. Ein leið til þess er að skrá ICE-neyðarnúmer í farsímann.

Tölvupóstur gengur nú manna á milli þar sem fólki er bent á að skrá ICE í farsímann sinn fyrir framan númer þess aðstandenda sem það vill að hringt verði í ef það lendir í slysi. Um er að ræða alþjóðlega skammstöfun en ICE stendur fyrir In Case of Emergency sem útlegst á íslensku í neyðartilviki. Hugmyndin er sú að þegar sjúkraflutningafólk, læknar, hjúkrunarfólk, björgunarsveitarmenn og fleiri hlúa að fólki sem lent hefur í slysi eða bráðum veikindum þá geti þeir fljótt fundið út hver nánasti aðstandandi er. Oft leita þeir í nafnalista í minni gsm síma en erfitt getur reynst að finna þar út hver nánasti aðstandandi er. Hugmyndin kemur upphaflega frá Bretlandi og breiðist nú hratt út.

Sigrún A. Þorsteinsdóttir, sviðstjóri hjá slysavarnarsviði Landsbjargar, segir að slík merking í gsm símum geti nýst vel. Björgunarsveitarmenn hafi lent í því að slasaðir einstaklingar séu ekki með skilríki á sér og erfitt hefur reynst að finna út hverjir nánustu aðstandendur þeirra eru.

Hjá lögreglunni í Reykjavík fengust þær upplýsingar að þar hefðu menn nýlega farið að kynna sér þetta og ekki enn orðið mikið varir við slíkar merkingar. Þeir voru sammála Sigrúnu um að það að hafa ICE neyðarnúmer í gsm símanum geti flýtt fyrir þegar reynt er að finna út hver nánsti aðstandandi er. Sigrún telur að þetta nýtist fólki sérstaklega þegar það er á ferð erlendis og því um að gera að setja landsnúmer fyrir framan það símanúmer sem skráð er sem ICE neyðarnúmer.