Ein flugbraut nægir ekki

Nýr flugvöllur á uppfyllingu á Lönguskerjum eða nýr flugvöllur á Hólmsheiði hafa verið áberandi í umræðunni en minna verið rætt um breyttar útfærslur á flugvellinum á núverandi stað. Samráðsnefnd ríkis og borgar um framtíð Reykjavíkurflugvallar fól hollensku ráðgjafafyrirtæki á sviði flugmála að gera flugtæknilega úttekt á vellinum í Vatnsmýri en markmiðið var að svara spurningum eins og hvort unnt sé að reka völlinn þar með einni flugbraut og hver þurfi að vera lágmarksstærð flugbrauta og athafnasvæðis ef völlurinn eigi að þjóna hlutverki sem miðstöð innanlandsflugs.

Hollensku ráðgjafarnir hafa nú komist að þeirri niðurstöðu að ein flugbraut nægi ekki, þar sem nýting vallarins verði innan við 80 prósent, vegna breytilegra vindátta. Jafnframt telja hinir erlendu ráðgjafar að austur-vestur brautin verði að vera aðalflugbraut vallarins vegna tíðni vindátta. Þeir telja að vilji menn losa umtalsvert svæði í Vatnsmýri til annarra nota en flugstarfsemi þá verði að færa austur-vestur brautina út fyrir núverandi flugvallargirðingu. Hin nýja austur-vestur braut verði þá að liggja að miklu leyti í sjó fram.

Ein af þremur hugmyndum sem þeir sýna er L-laga flugvöllur, en þessi hugmynd var einnig kynnt af samgönguyfirvöldum fyrir flugvallarkosninguna á sínum tíma. Þessa leið sér forseti Flugmálafélags Íslands, Arngrímur Jóhannsson, fyrrverandi forstjóri Atlanta-flugfélagsins, sem líklega sáttalausn en með henni er talið að taka megi yfir 70 hektara af flugvallarsvæðinu undir aðra starfsemi.