Meirihluti unglingsstúlkna vill hækka kynferðislegan lögaldur

Meirihluti stúlkna vill hækka kynferðislegan lögaldur, samkvæmt nýrri könnun um kynhegðun unglinga á Íslandi. Forstjóri Barnaverndarstofu segir þetta ákall frá stúlkunum.

Bandarnaverndastofa og Rannsóknir og greining, sem er sjálfstæð rannsóknarstofnunin innan Háskólans í Reykjavík, kynntu í dag niðurstöðu viðamikillar könnunar á kynhegðun ungs fólks hér á landi og kynferðislega misnotkun. Könnunin var gerð í öllum framhaldsskólum landsins árið 2004 og byggist hún því á svörum um 10.500 nemenda.

Meðal þess sem kemur fram er að fjögur prósent ungmenna á áldrinum 16-19 ára höfðu haft kynmörk fyrir 13 ára aldur en um þriðjungur stúlkna og tæpur helmingur drengja hafði aldrei haft kynmök við 19 ára aldur. Langflestar stelpurnar höfðu haft kynmök við sér eldri menn í fyrsta sinn, eða tvær af hverjum þremur. Hins vegar töldu 56 prósent stúlknanna að kynferðislegu lögaldur ætti að vera 15 eða sextán ár en hann er nú 14 ár.

Forstjóri Barnaverndastofu segir þetta vera ákall hjá ungum stúlkum um aukna vernd. í svörunum megi finna sterks rök fyrir því að færa kynferðsilegan lögaldur til samræmis við það sem gerist annars staðar á Norðurlöndum.

Rannsakendur komust einnig að því að góður meirihluti pilta á aldrinum 16-19 ára, eða 57 prósent, skoðar klám einu sinni eða oftar í viku. Stærstur hluti stúlkna skoðar hins vegar klám nokkrum sinnum á ári eða sjaldnar. Þegar þessar niðurstöður eru bornar saman við athugun á afstöðu ungs fólks til kynmaka til skemmtunar en án tilfinninga kemur í ljós að strákar eru mun jákvæðari gagnvart því.

Þetta segja rannsakendur að bendi til tengsla milli klámnotkunar og kynhegðunar. Bryndís Björk Ásgeirsdóttir, félagsfræðingur og ein þeirra sem stóðu að rannsókninni, segir að hins vegar sé orsakasamhengið ekki skýrt. Það sjáist þó að þeir drengir og þær stúlkur sem horfi mikið á klám séu líklegri til að hafa ólíkar hugmyndir til kynlífs en þeir sem horfi minna á klám.

Forstjóri Barnaverndarstofu segir að foreldrar verði að gera sér grein fyrir hugsanlegum áhrifum klámnotkunar. Foreldrar verði að ræða við börnin um klámefni bæði á Netinu og annars staðar og um eðlileg samskipti kynjanna og heilbrigði kynlífs.