Börn reyna við Óskarinn

Kvikmyndin Börn eftir Ragnar Bragason og Vesturportshópinn er fulltrúi Íslands í forvali til tilnefninga um Óskarsverðlaunin fyrir bestu erlendu kvikmyndina 2007.

Meðlimir Íslensku kvikmynda- og sjónvarpsakademíunnar kusu á milli Barna og Blóðbanda, eftir Árna Óla Ásgeirsson, á miðvikudag og höfðu Börn betur í kosningunni.

Börn munu því etja kappi um þessi eftirsóttu verðlaun við kvikmyndir úr öllum heimshornum en Óskarsverðlaunaakademían kynnir tilnefningar sínar til verðlaunanna hinn 23. janúar og verðlaunin verða afhent í Los Angeles 25. febrúar á næsta ári.