40 milljónir fyrir Concert

Tónleikahald hér á Íslandi er alls ekki auðveldur rekstur og þessi sameining á eftir að létta mikið undir með mér, segir Einar Bárðarson sem seldi Senu ráðandi hlut í fyrirtæki sínu Concert í gær.

Sena er eitt stærsta fyrirtæki landsins á sviði afþreyingar og á Samkeppnisstofnun eftir að leggja blessun sína yfir kaupin. Einar Bárðarson var mjög sáttur þegar Fréttablaðið ræddi við hann í gær, enda segist hann um þó nokkurt skeið hafa verið að leita sér að sterkum bakhjarli.

Einar eyðir mestum af sínum tíma í rekstur útgáfufélags síns Believer í London en þessi sameining á ekki eftir að hafa mikil áhrif á tvo stærstu skjólstæðinga Einars, Nylonflokkinn og Garðar Thor Cortes. Ég sá fram á að Sena gæti orðið öflugur bakhjarl á tónleikamarkaðinum sem þeir ætluðu að fikra sig inn á og því ákvað ég að slást í hópinn, útskýrir Einar sem vildi ekki gefa upp kaupverðið en sagðist ánægður með viðskiptin. Samkvæmt heimildum Fréttablaðsins er kaupverðið ekki undir fjörutíu milljónum.

Aðspurður hvort þessi sameining þýddi ekki i að Íslendingar mættu eiga von á enn stærri viðburðum á næstunni útilokaði Einar ekki að svo kynni að vera. Árið í ár hefur verið með daprasta móti miðað við síðastliðin sumur og Einar sagði að markaðurinn væri ef til mettur eftir algjöra sprengju af stórum hljómsveitar og tónlistarnöfnum. Það sem eftir lifir 2006 og árið 2007 verður mjög skemmtilegt og við sjáum fram á mjög spennandi og bjarta tíma, sagði Einar en vildi ekki gefa upp hvað væri á teikniborðinu.

Samkvæmt fréttatilkynningu frá Senu eru kaupin á Concertliður í að styrkja enn frekar öflugan vettvang fyrir lifandi tónlist og aðra viðburði. Tónleika- og viðburðardeild Senu heldur því áfram að stækka við sig því síðastliðið sumar var einn öflugasti tónleikahaldari landsins, Ísleifur B. Þórhallsson, ráðinn til starfa hjá Senu með það fyrir augum að hefja sókn í tónleikahaldi fyrir hönd fyrirtækisins.