Bond í Sunspel-nærbuxum

Daniel Craig mun klæðast Sunspel-nærbuxum í nýjustu Bond-myndinni, Casino Royale, en frá þessu er greint á fréttavefnum Contactmusic.com.

Meðal aðdáenda Sun­spel er leikarinn Johnny Depp en buxurnar urðu frægar eftir að karlkyns fyrirsætan Nick Kamen klæddist þeim í auglýsingu frá Levi‘s árið 1985. Samkvæmt talsmanni Sunspel er fyrirtækið mjög spennt fyrir þessari nýju ímynd. „Þetta er mjög stór samningur fyrir okkur. Það er mikill áhugi á þessari kvikmynd um allan heim og við treystum því að áhuginn á nærbuxunum eigi eftir að aukast samfara því,“ sagði talsmaðurinn eftir að tilkynnt hafði verið um samninginn.

Nýjasta Bond-myndin verður frumsýnd í nóvember og má reikna með metaðsókn enda vekur það allaf athygli þegar nýr leikari bregður sér í hlutverk leyniþjónustumannsins James Bond. Daniel Craig mátti þola mikla háðsglósur í fyrstu en nú þegar myndbrot úr Casino Royale hafa birst eru flestir orðnir sannfærðir um að leikarinn hafi verið hárrétt val.