Konur hertaka mýrarboltann

Það stefnir í metþátttöku hjá okkur, segir Óli Karlsson, formaður Mýrarboltafélags Íslands, en um næstu helgi fer fram óformlegt Evrópumeistaramót í þessari sérstæðu útfærslu af vinsælustu íþrótt heims í Tungudal á Ísafirði. Ég er reyndar ekki með staðfesta tölu en mér skilst að liðin séu orðin vel yfir tuttugu, bætir Óli við.

Mýrarboltinn á ættir sínar að rekja til Finnlands þar sem finnski herinn og síðar landsliðið í skíðagöngu voru látin hlaupa í mýrum. Til að gera æfinginguna enn skemmtilegri var farið að sparka í bolta en nú er svo komið að þessi íþrótt er orðin ein sú allra vinsælasta þar í landi. Heimsmeistaramótið er haldið í Finnlandi og þar keppa yfir 270 lið en þetta er einn stærsti íþróttaviðburður Finnlands, segir Óli. Reglurnar eru mjög áþekkar því sem flestir þekkja frá knattspyrnunni en það er engin rangstaða og þá er hæfilegur tuddaskapur leyfilegur.

Mótið er hið þriðja í rððinni en það var fyrst haldið árið 2004. Að þessu sinni stefnir allt í að konur verði áberandi á mótinu og segist Óli hafa heimildir fyrir því að kvennalið frá Súðavík stundi nú æfingar af kappi. Strákarnir þurfa því að girða sig í brók ef þeir vilja ekki verða undir í ár, bætir hann við en auk Evrópumeistaratitilsins verða veitt verðlaun fyrir drullugasta leikmanninn og flottasta búninginn.

Mýrarboltafélagið stefnir ótrautt að því að gera þennan viðburð enn stærri og segir Óli að hugmyndin sé að færa mótið yfir á verslunarmannahelgina að ári. Þá séu einnig hugmyndir um að markaðssetja mótið erlendis en þeir vilji þó fyrst selja hugmyndina enn betur hér á landi áður en sú útrás hefst. Við höfum reyndar heyrt af því að danskt lið hafi skráð sig til leiks núna, segir Óli.