Hádegistónar í Hallgrímskirkju

Orgelleikarinn Kári Þormar heldur hádegistónleika kl. 12 í Hallgrímskirkju í dag. Á sínum tíma var Kári fyrsti nemandinn sem lauk orgelnámi hér heima með tónleikum á hið glæsilega Klais-orgel í Hallgrímskirkju og endurnýjar hann því kynni sín af því merka hljóðfæri. Hann stundaði síðar framhaldsnám í orgelleik og kirkjutónlist í Düsseldorf í Þýskalandi.

Að námi loknu var Kári organisti Kópavogskirkju, Fríkirkjunnar í Reykjavík en frá 2001 hefur hann verið organisti Áskirkju. Hann hefur haldið fjölda tónleika hér heima og erlendis, auk þess sem hann hefur komið fram með Mótettukór Hallgrímskirkju bæði á tónleikum og í sjónvarpi.

Á efnisskrá Kára eru fjögur verk. Fyrst leikur hann sálmforleik eftir Sigfrid Karg-Elert og svo „Variations sur un thème de Clément Janequin“ eftir Jehan Alain. Þriðja verkið er Prelúdía og fúga í G-dúr eftir Johann Sebastian Bach og tónleikunum lýkur með „Prélude et Fugue sur le nom d‘Alain“ eftir Maurice Duruflé en verkið er einmitt samið í minningu Jehan Alain, sem lést langt fyrir aldur fram í síðari heimsstyrjöldinni.

Tónleikarnir eru skipulagðir í samvinnu við Félag íslenskra orgelleikara og eru liður í tónleikaröð Alþjóðlegs orgelsumars í Hallgrímskirkju.