Vildi gera strákinn að manni

Heimir Sverrisson og Daníel sonur hans dvöldust í Kína í tvo mánuði í sumar. Þeir tóku ævintýri sín upp og verða þættir um ferð þeirra sýndir á Skjá einum í haust.

Heimir segir ferðina hafa komið til af því að hann vildi gera eitthvað óvenjulegt með Daníel í sumar. Þetta kom svona í staðinn fyrir að sópa göturnar með unglingavinnunni. Mig langaði að víkka sjóndeildarhringinn aðeins hjá stráknum, gera hann að manni, segir Heimir og hlær. Aðalástæðan var að ég vildi eiga þennan tíma með honum í allt annarri menningu þar sem við þyrftum að takast svolítið á við hlutina sjálfir, útskýrir hann.

Heimir segir sig alltaf hafa langað til að fara til Kína. Ég hef alltaf haft áhuga á kínverskri menningu, landi og náttúru og vildi sjá þetta með eigin augum, segir Heimir. Hann segir allt hafa staðið undir væntingum, en margt hafa komið sér á óvart. Það er erfitt að lýsa því hvað kom mest á óvart. Menningin er mjög skrýtin og umferðarmenningin alveg út í hött. Svo er matarmenningin náttúrulega mjög sérstök og skemmtileg, segir Heimir.

Heimir segir tvo staði á ferðalagi þeirra standa upp úr í minningunni. Við fórum kannski ekki á hefðbundnustu staðina, útskýrir hann. Við fórum til dæmis í Shaolin klaustur þar sem að Kung fu var fundið upp fyrir 1500 árum. Daníel var að læra Kung fu með munkunum frá fimm á morgnana og fram á kvöld í tvær vikur, segir Heimir. Við fengum nú nokkur sjokk þar líka, því munkarnir berja nemendur sína sundur og saman ef þeir hlýða ekki. Við urðum vitni að því að þeir börðu litla stráka með spjótum, heldur Heimir áfram. Hinn staðurinn var svo SOS barnaþorp þar sem við dvöldumst í viku og kynntumst alveg frábæru fólki.

Daníel segir sveitina standa upp úr fyrir sitt leyti. Það var svo fallegt í Yangzhou sveitinni. Áður en við fórum þangað vorum við bara í stórborgum. Sveitin er önnur hlið á landinu og aðeins meira eins og ég hafði ímyndað mér Kína. Hann segist samt hafa orðið fyrir dálitlu áfalli þegar út úr borginni var haldið. Ég sá fullt af heimilislausu fólki og rónum sem sátu allsberir úti á götu og borðuðu úr ruslinu. Þeir áttu ekki neitt. segir Daníel. Hann segist þó endilega vilja snúa aftur til Kína. Þetta er örugglega besta sumar sem ég hef upplifað hingað til, segir Daníel.