Kosningaþátttaka innflytjenda geti hugsanlega ráðið úrslitum

Þátttaka innflytjenda getur hugsanlega skipt sköpum varðandi úrslit kosninga í einstökum bæjarfélögum, að mati framkvæmdastjóra Alþjóðahúss. Hann bendir á hópurinn sé stór og mikilvægur og að stjórnmálaflokkarnir séu að átta sig á þeirri staðreynd.

Nærri 4500 erlendir ríkisborgarar hafi rétt til að kjósa í kosningunum eftir tíu daga samkvæmt opinberum tölum. Eru það ríflega tvöfalt fleiri en fyrir fjórum árum þegar um 2150 erlendir ríkisborgarar höfðu kosningarétt. Um eitt þúsund erlendir ríkisborgarar sem hafa kosningarétt nú koma frá einhverju hinna norrænu ríkjanna en til þess að öðlast kosningarétt þurfa þeir að hafa búið hér samfellt í þrjúr ár fram á kjördag. Aðrir erlendir ríkisborgarar þurfa hins vegar að hafa búið hér í fimm ár samfellt. Í þeirra hópi eru Pólverjar langfjölmennastir á kjörskrá eða 822.

Alþjóðahúsið hefur kynnt kosningarnar fyrir innflytjendum hér á landi og hefur meðal annars haldið fundi á ellefu tungumálum með fulltrúum stjórnmálaflokkanna í borginni. Þá hefur Alþjóðahúsið gefið út blað með upplýsingum um kosningarnar og dreift um allt land.

Einar Skúlason, framkvæmdastjóri Alþjóðahússins, segir stjórnmálaflokkana vera að átta sig á hversu stór hópur innflytjendur með kosningarétt séu. Hann bendir á að tvö prósent kjósenda séu erlendir ríkisborgarar og önnur tvö prósent fólk sem fengið hafi íslenskan ríkisborgararétt og því sé hér um stækkandi hóp að ræða.

Einar bendir á kjósendur af erlendu bergi brotnir séu margir hverjir óskrifað blað í stjórnmálum og því spennandi að sjá hverjum þeir greiði atkvæði. Í einstökum sveitarfélögum þar sem innflytjendur séu margir geti þeir ráðið miklu um niðurstöðu kosninga.

Frambjóðendur úr röðum innflytjenda er einnig að finna á listum víða um land. Hann nefnir Bolungarvík sem dæmi en þar eru innflytjendur á öllum listum.