Bradford slær til baka

Stóra Colin Farrell málið, sem fjölmiðlar vestur í Bandaríkjunum kalla svo, heldur áfram því fyrirsætan Dessareae Bradford, sem veittist að leikaranum í kvöldþætti Jay Leno í síðustu viku, hefur höfðað mál á hendur honum og krefst 730 milljón króna í skaðabætur. Bradford hefur kært Farrell tvívegis áður, þar af fyrir kynferðislega áreitni í fyrra en báðum kærunum var vísað frá.

Bradford, sem átti í skamvinnu ástarsambandi við Farell, hélt blaðamannafund í Los Angeles í fyrradag þar sem hún bar í bætifláka fyrir framgöngu sína í kvöldþættinum og sagðist aðeins hafa ætlað að afhenda leikaranum stefnu. Hún skammaði Farrell í myndveri þáttarins fyrir að segja að hún elti hann á röndum og hefur nú kært hann fyrir meiðyrði af sömu ástæðu. Colin særði mig djúpt, sagði hún á blaðamannafundinum um leið og hún dreifði eintökum af bók sinni Colin Farrell: Kolklikkaður hvolpur. Ég ætla að hrekja þessar ærumeiðingar.

Farrell bað um og fékk bráðabirgðarnálgunarbann sett á Bradford þar sem hann sagðist óttast um öryggi sitt og fjölskyldu sinnar. Það er í gildi þar til 16. ágúst en þá mætir Bradford fyrir rétt til að svara ávirðingum Farrell.