Skaðabætur vegna myndbirtingar DV?

Ekki verður annað séð en stúlkan á myndinni sem birt var ranglega í DV síðastliðinn laugardag eigi rétt á skaðabótum, ekki síst í ljósi dómsins í máli Bubba Morthens gegn Hér og nú. Þetta segir kennari við lagadeild Háskólans í Reykjavík.

Grein DV fjallar um handtöku tæplega tvítugrar stúlku sem stöðvuð var á Keflavíkurflugvelli nýverið með 140 grömm af kókaíni innvortis. Blaðið nafngreinir stúlkuna, sem gat sér gott orð fyrir skíðaiðkun á árum áður, og fyrirsögnin er: „Skíðastúlka með kókaín innvortis." Með greininni er hins vegar birt mynd af annarri stúlku, Elsu Guðrúnu Jónsdóttur, margföldum Íslandsmeistara í skíðagöngu.

Ritstjóri DV sagði í fréttum NFS á laugardag að mistökin lægju í því að við leit á vefnum eftir nafni stúlkunnar sem handtekin var birtist mynd af Elsu. Samkvæmt athugun NFS reynist svo vera, en myndin, sem er í smækkaðri útgáfu, er nokkurs konar forsíðumynd fyrir umfjöllun um tiltekið skíðamót á vef Skíðafélags Ólafsfjarðar. Með því að smella á myndina og skrolla niður birtist hún hins vegar í fullri stærð með nafni Elsu fyrir neðan.

Burtséð frá mistökunum virðist sem DV hafi brotið höfundalög með því að birta myndina án leyfis rétthafa. Rán Tryggvadóttir, sérfræðingur í hugverkarétti og kennari við lagadeild Háskólans í Reykjavík, segir þær myndir sem ekki teljist listrænar njóta verndar í 49. grein höfundalaganna, og sú vernd hafi nýlega verið aukin með lagabreytingu á Alþingi. Samkvæmt þeirri grein má ekki birta myndir sem almenningur tekur, án þess að fá leyfi þess sem á myndina.

Aðspurð hvernig hún lítur stöðu Elsu með hugsanlega málsókn í huga á hendur DV segir Rán að myndbirtingin hljóti að teljast mikil ærumeiðing, en tekur fram að hún sé ekki sérfræðingur í refsirétti. Hún bendir á í þessu samhengi mál Bubba Morthens gegn tímaritinu Hér og nú þar sem ritstjóri blaðsins var dæmdur til að greiða Bubba skaðabætur vegna birtingar myndar af honum með ógætilegri fyrirsögn. Þegar þessum málum sé stillt upp saman sé ljóst að Elsa hljóti að eiga rétt á skaðabótum. Þó hafi í máli Bubba gegn Hér og nú verið um viljandi myndbirtingu að ræða.

Faðir Elsu sagði í samtali við NFS í kvöld að verið sé að skoða, í samráði við lögfræðing, hvort höfðað verði skaðabótamál vegna myndbirtingarinnar.