Tíu særðust í mótmælum við aðskilnaðarmúr

Tíu manns hlutu sár í morgun þegar ísraelski herinn réðst til atlögu gegn Palestínumönnum sem voru að mótmæla aðskilnaðarmúrnum í nágrenni Jerúsalem.

Fólkið var að mótmæla múrnum í nágrenni við þorpið Bilin, rétt hjá Ramalla, sem er um tuttugu mínútna akstur frá Jerúsalem á svæði Palestínumanna. Yfirvöld í Ísrael hafa undanfarnar vikur verið að fylla upp í göt á múrnum í nágrenni við Jerúsalem. Múrinn er farinn að hafa veruleg áhrif á Palestínumenn sem nálægt honum búa, en hann er enn í byggingu. Þegar verkinu er lokið verður um að ræða rúmlega 700 kílómetra múr sem skilur Ísraela að frá svæðum Palestínumanna. Múrinn fer sums staðar inn á svæði Palestínumanna og margir óttast að þótt eiginleg landamæri eigi að vera önnur, þá muni múrinn í raun aðgreina þau tvö þjóðfélög sem friðarsamningar gera ráð fyrir að þarna verði til frambúðar. Í átökunum í morgun skutu ísraelskir hermenn gúmmíkúlum á mótmælendur, með þeim afleiðingum að tíu hlutu sár. Ljósmyndari sem fékk skot í sig sagði að hermenn hefðu skotið af tíu til fimmtán metra færi, þótt ljóst hefði mátt vera að hann hefði verið að störfum, en ekki að mótmæla.