Lék aðalhlutverkið í Bollywood-mynd

Sigríður Hrönn Guðmundsdóttir hefur verið að gera það gott sem fyrirsæta á Indlandi þar sem hún starfar fyrir Eskimo. Sigga hefur varla undan að sinna verkefnum sem hafa verið allt frá litlum auglýsingum upp í leik í stórum Bollywood myndum og tónlistarmyndböndum.

Upphaflega ætlaði Sigga aðeins að dvelja á Indlandi í rúman mánuð. Þeir urðu fimm en þá kom hún til Íslands til þess að klára BS ritgerð sem hafði fengið að sitja á hakanum um tíma. Stoppið varð stutt og ritgerðinni var skellt á hakann að nýju þegar henni bauðst stórt verkefni á Indlandi. Ég fékk aðalhlutverkið í svokallaðri Bollywood crossover kvikmynd; mynd sem er á ensku en með indversku þema. Ég ákvað að slá til enda fékk ég vel borgað. Auk þess er það ekki oft sem maður fær að leika aðalhlutverk í bíómynd, segir Sigga. Hlutverkið var upphaflega skrifað með strák í huga. Ég fór í prufu fyrir hlutverk kærustunnar hans og var ráðin á staðnum. Daginn eftir fékk ég símtal og var tilkynnt að þeir ætluðu að endurskrifa handritið og breyta aðalhlutverkinu í kvenhlutverk sem mér var boðið. Sigga leikur stelpu sem langar að stofna hljómsveit. Í myndinni er ég að reyna að sannfæra fólk um að vera með í bandinu og að sjálfsögðu meikum við það í lokin.

Myndin var tekin upp í Birmingham á Englandi. Tökur stóðu í mánuð og vinnudagarnir voru allt að 17 klukkutímar. Þetta var mjög fyndið, mikið af söng og dansi. Vissulega komu nokkur ég-trúi-því-ekki-að-ég-sé-að-gera-þetta augnablik en þetta vilja Indverjarnir, segir Sigga og hlær.

Fyrrnefnd mynd var ekki frumraun Siggu á leiklistarsviðinu. Skömmu fyrir þetta lék ég í risastórri Bollywood mynd sem skartaði Amitab í aðalhlutverki en hann er ein stærsta stjarnan á Indlandi. Ég lék kærustuna hans sem var frekar undarlegt þar sem hann er á sjötugsaldri. Ég fékk prinsessumeðferð og risastórt lúxus einkabúningsherbergi eins og hinar stjörnurnar. Þeir eru svo yndislega dramatískir Indverjarnir. Herbergið var vaktað af tveimur vopnuðum vörðum. Þetta var mjög yfirþyrmandi. Sviðið var rosalegt, 60 dansarar og tonn af aukaleikurum sem margir hverjir báðu um myndir af mér með sér, segir Sigga sem hefur fengið nokkur kvikmyndatilboð síðan.

Á heimasíðu Eskimo á Indlandi kemur fram að Sigga sé sú fyrirsæta skrifstofunnar sem njóti mestrar velgengni, sé vinsælust og fjölhæfust Eskimos most successful, popular & versatile model. Sem fyrr segir hafa mótleikarar hennar í sumum tilfellum verið stórstjörnur í sínu heimalandi. Fólki finnst mjög mikið til þess koma ef maður er í atriði eða auglýsingu með frægum leikurum og ég er mikið spurð að því hvernig hafi verið að vinna með hinum og þessum, segir Sigga og hlær. Það verkefni sem fólk hérna þekkir mig helst úr er tónlistarmyndband sem ég lék í. Það er hræðilegt á íslenskan mælikvarða og meðan á tökum stóð endurtók ég endalaust í hausnum á mér að ég væri á Indlandi og að enginn ætti eftir að sjá þetta. En myndbandið fór í 3. sæti indverska listans og var mest umbeðna myndbandið á MTV og VH1. Ég var reyndar komin til Íslands þegar það fór í spilun og það var skrítið að fá tölvupóst og símtöl frá fréttamönnum að spyrja mig hvernig það væri að vera fræg á Indlandi.

Þegar ég kom aftur var fólk í verslanamiðstöðinni að biðja mig um eiginhandaráritanir, lagið var spilað þegar ég gekk inn í verslanir eða á veitingastaði og meira að segja í kaffiteríunni á flugvellinum. Svo bíða allir skælbrosandi með eftirvæntingarsvip, eins og ég ætli bara að standa upp og mæma lagið eins og ég gerði í myndbandinu. Þetta var mjög skrítin upplifun og oft óþægilegt, segir Sigga en bætir brosandi við: Æ, samt voða krúttlegt líka.

Sigga segist reikna með að dvelja á Indlandi fram að jólum. Auðvitað saknar maður fjölskyldu og vina þótt mér líði vel hérna. Ég er að reyna að ákveða hvað ég geri eftir jól. Kannski ég drífi mig í bakpokaferðalag um Asíu, það er búið að standa til lengi. Svo er Eskimo að skoða skrifstofur fyrir mig í Dubai, Malasíu og á fleiri stöðum. Já og svo ætlaði ég nú alltaf í mastersnám!