Sign fær góða dóma

Rokkhljómsveitin Sign fær góða dóma fyrir tónleika sína í Birmingham í nýjasta tölublaði tónlistartímaritsins virta Kerrang!

Blaðamaður telur Sign vera á hraðferð upp frægðarstigann í rokkheiminum og telur líklegt að hljómsveitin muni sjálf fylla stærri tónleikastaði á næstunni. Líkir hann Sign við hljómsveitina Vain en segir hljóminn vera nútímalegri og þyngri. Sign virðast hafa allt á tæru með söngvarann Zolberg með sírenuröddina í fararbroddi, sem er stjarna tilbúin að feta í fótspor Valos, segir blaðamaðurinn og á þar við söngvara hljómsveitarinnar Him.

Sign lýkur þriggja vikna tónleikaferð sinni um Evrópu á Mean Fiddler í London á fimmtudagskvöld. Sveitin hefur verið að hita upp fyrir Wednesday 13 sem er hljómsveit fyrrverandi söngvara Muderdolls.

Sign spilar á Íslandi á fimm tónleikum í næstu viku. Þeir fyrstu hefjast á Akranesi 13. október og þeir síðustu verða á NASA á Kerrang!-kvöldi Iceland Airwaves 20. október.