Eyðir heilum mánuði í tælenskum bardagabúðum

Unnur Linda Konráðsdóttir leggur stund á heldur ófhefðbundna íþrótt, en hún hefur dvalist í muay-thai æfingabúðum á Tælandi síðasta mánuðinn. „Muay thai er tælensk kickbox íþrótt. Það er leyfilegt að sparka, kýla og nota olnbogana og hnén í bardögum," útskýrir Unnur, sem hefur aldrei lagt stund á bardagaíþróttir áður og segist einfaldlega hafa viljað koma sér í gott líkamlegt form.

„Ég er þessi týpa sem hefur miður lítinn sjálfsaga hvað varðar líkamlegt erfiði," segir hún. „Ég sá þátt þar sem átti að koma Jack Osborne, syni Ozzie Osborne, í form. Það var víst erfitt að halda honum við efnið og þjálfararnir hans ákváðu að senda hann í muay thai búðir, sem eru mjög strangar. Ég hugsaði bara að þetta væri nú eitthvað fyrir mig," segir Unnur, sem segir það hafa komið sér á óvart hversu miklar misþyrmingar mannslíkaminn þolir. „Þrátt fyrir að vera marinn og blár eftir spörk og olnbogaskot og stöðugar æfingar hélt líkaminn á mér áfram að gera eins og honum var sagt," segir hún. „Að minnsta kosti þangað til að ég varð lasin," bætir hún við.

Unnur segir muay thai vera tilvalið fyrir stelpur. „Ég hef farið á nokkra bardaga hérna úti og það er tvennt ólíkt að sjá stelpurnar og strákana berjast. Stelpurnar gefa allt sitt í hverja lotu á meðan strákarnir byrja hægt og trappa sig upp. Það var ein hérna með mér í búðunum sem tók þetta svo alvarlega að það vildi enginn strákur æfa með henni lengur, hún sá bara rautt," segir Unnur hlæjandi. „Í þessu skipta hraði og hittni meira máli en styrkur eða stærð."

Unnur hefur þó ekki tekið þátt í bardögum sjálf. „Ég hef bara „sparrað" á æfingum," segir hún. „Það er eins konar gamnislagur til að undirbúa sig fyrir keppni. Þjálfarinn lét mig gera það strax tveimur dögum eftir að ég kom. Ég stóð uppi með glóðarauga eftir það, þetta er mjög gróft."