Arthur Lee látinn

Einn af helstu goðsögnum hippatímabilsins, Arthur Lee, lést á sjúkrahúsi í Memphis á fimmtudag. Lee var 61 árs gamall og var banamein hans hvítblæði. Lee var söngvari og aðallagasmiður hinnar goðsagnakenndu hljómsveitar Love frá Los Angeles. Hafði hljómsveitin gríðarleg áhrif á margar samtímahljómsveitir sínar eins og til dæmis The Doors. Plata hljómsveitarinnar, Forever Changes, frá árinu 1967, hefur meðal annars oft og mörgum sinnum ratað inn á lista yfir bestu plötur sögunnar hjá ýmsum tónlistarmiðlum.

Lee barðist hins vegar sjálfur við sín eigin andlegu vandamál sem gerði það að verkum að erfitt þótti að vinna með honum. Síðustu ár voru þó farsæl fyrir Lee, sem spilaði á fjölsóttum tónleikum og gaf meðal annars út DVD-disk með tónleikum hans í The Royal Festival Hall í London þar sem Forever Changes var spiluð í heild sinni.