Góðir gestir á Innipúkanum

Hin skemmtilega hátíð Innipúkinn hefst í kvöld þar sem fram kemur rjóminn af íslensku tónlistarfólki auk áhugaverðra erlendra listamanna en hátíðin fer nú fram í fimmta skiptið. Steinþór Helgi Arnsteinsson kynnti sér betur erlendu gestina.

Það verður að segjast alveg eins og er að erlendu gestirnir í ár eru ekki eins spennandi og þeir voru í fyrra, enda leiddu þar saman hesta sína til dæmis Cat Power, Blonde Redhead, Jonathan Richman og The Raveonettes. Erlendu gestirnir í ár eru þó langt frá því að vera einhverjir aukvisar eða óspennandi.

Stærsta nafnið á hátíðinni í ár er án efa hin goðsagnakennda hljómsveit Television, með Tom Verlaine í fararbroddi. Þó að ekki margir þekki hljómsveitina eru áhrif hennar gífurleg, meðal annars á pönkið og hljómsveitir á borð við Strokes, Sonic Youth og jafnvel U2. Platan Marquee Moon frá árinu 1977 þykir eitt af meistaraverkum rokksögunnar og sem dæmi var hún í sæti númer tvö í nýjasta hefti tónlistartímaritsins Uncut yfir bestu frumburði sögunnar, einungis fyrsta plata Velvet Underground þótti betri. Frá 1978 hefur ferill Television verið nokkuð slitróttur en til Íslands mæta þó allir upprunalegu meðlimir sveitarinnar, fyrir utan bassaleikarann Fred Smith.

Ein farsælasta indí-sveit Bandaríkjanna

Önnur goðsögn sem mun spila á Innipúkanum í ár er hljómsveitin Throwing Muses. Sú sveit var stofnuð af hálfsystrunum Kristinu Hersh og Tanyu Donelly á fyrri hluta 9. áratugarins og tengist hún mikið hinni gróskusömu Boston-bylgju sem var upp á sitt besta um 1990, með Pixies í farabroddi. Þó má fær góð rök fyrir því að Throwing Muses hafi lagt farveginn fyrir frekari vinsældir Pixies.

Donelly sagði skilið við sveitina árið 1992 til að ganga til liðs við The Breeders (þar sem Kim Deal, bassaleikari Pixies, var einnig). Héldu þá margir að dagar sveitarinnar væru taldir en árið 1995 afsannaði sveitin allar slíkar getgátur með plötunni University sem fékk frábæra dóma beggja vegna Atlantshafsins. Hersh lagði sveitina síðan aðeins til hliðar nokkru seinna en árið 2003 kom út ný skífa frá sveitinni, samnefnd henni, sem fékk misjafna dóma en sé hún til dæmis borin saman við University er Throwing Muses-platan mun rokkaðri. Hljómsveitin hefur því vonandi engu gleymt og því verður forvitnilegt að sjá hana spila á Nasa á laugardagskvöldið. Hollensk stuðgella og rokkaðir DanirHinar erlendu sveitirnar eru ekki alveg af sömu stærðargráðu og Television og Throwing Muses en þær eru langt frá því að vera óáhugaverðar. Solex er sem dæmi eins manns hljómsveit frá Hollandi, skipuð hinni framsæknu Elisabeth Esselink. Hún hefur gefið út nokkrar plötur hjá bandaríska plötufyrirtækinu Matador sem hefur gefið út ekki minni spámenn en Mogwai, Yo La Tengo, Pavement og fleiri. Solex spilar skemmtilegt elektró-popp sem verður vafalaust hægt að dilla sér vel við.

Á sunnudeginum spilar svo danska indírokksveitin Speaker Bite Me, sem hefur verið afar vinsæl í heimalandi sínu og jafnvel víðar frá síðasta hluta seinustu aldar. Plötur sveitarinnar hafa komið út víða um Evrópu og hefur sveitin meðal annars fengið lög sín spiluð í framsæknasta þætti MTV, Alternative Nation. Meðlimir sveitarinnar hafa allir verið mjög virkir í alls konar verkefnum og því hefur hljómsveitin ekkert verið alltof virk sem slík. Ný plata er þó væntanleg á næsta ári.

Einn meðlimur Speaker Bite Me, Signe Høirup Wille-Jørgensen, mun einnig spila sérstaklega á föstu­dagskvöldinu undir nafninu Jomi Massage, sem er sólóverkefnið hennar. Hana má einnig berja augum í 12 Tónum í dag þegar hinir árlegu upphitunartónleikar fara fram. Auk Jomi Massage spila einnig Eberg, The Foghorns og Gavin Portland. Upphitunartónleikarnir byrja klukkan 16 og síðan er bara að skella sér á sjálfan Innipúkann um helgina.