Alcan fær orku frá Hellisheiðarvirkjun

Alcan og Orkuveita Reykjavíkur skrifuðu í morgun undir sextíu milljarða króna samning sem tryggir stækkuðu álveri í Straumsvík 200 megawött á ári, -sem er tæplega helmingur þeirrar orku sem til þarf.

Samningaviðræður hafa staðið frá í fyrra. Alcan ætlar að stækka álverið í Straumsvík úr 180 þúsund tonnum, -upp í 460 þúsund tonn. Orkuveitan ætlar að skaffa 40 prósent þeirrar orku sem þarf, -hana á að vinna úr jarðvarma í Hellisheiðarvirkjun.

Samkvæmt samningunum sem skrifað var undir í morgun, -af æðstu mönnum beggja fyrirtækja, -á orkan að vera klár til afhendingar eftir fjögur ár. Landsvirkjun útvegar síðan þá orku sem upp á vantar, -ef allt gengur upp, -en málið er fjarri því að vera í höfn segir Rannveig Rist, forstjóri Alcan á Íslandi. Enn á eftir að ganga samningi við Landsvirkjun um 60% af orkunni. Umhverfismat og starfsleyfi eru klár, en Hafnarfjarðarbær er ekki búinn að afgreiða það sem að honum snýr.

Ekki verður af atkvæðagreiðslu meðal Hafnfirðinga um stækkun álversins í Straumsvík, -samhliða bæjarstjórnarkosningunum eftir hálfan mánuð, -eins og talað hefur verið um. Þetta kom fram í máli Lúðvíks Geirssonar bæjarstjóra á Fréttavaktinni eftir hádegi á NFS í dag.