Sjávarútvegsráðherra viðstaddur sjávarútvegssýningu í Brussel

Einar K. Guðfinnsson sjávarútvegsráðherra var viðstaddur sjávarútvegssýningu í Brussel sem haldin var 9. og 10. maí. Þetta er stærsta fagsýning í heimi á sviði sjávarútvegs og tóku meira en 1600 fyrirtæki frá hátt í 70 löndum þátt í henni. Um 30 íslensk fyrirtæki kynntu starfsemi sína á sýningunni. Sýnendur nota gjarnan tækifærið til að kynna nýjungar í framleiðslu sinni og afhjúpaði sjávarútvegsráðherra við sérstaka athöfn nýja gerð kerja frá Sæplasti.

Á sýningunni átti sjávarútvegsráðherra óformlegan fund með Patrick Tabone sem stýrir skrifstofu framkvæmdastjóra Evrópusambandsins í sjávarútvegsmálum. Meðal annars skoðuðu þeir nýjan vef sem hefur verið opnaður um umhverfismerkingar sjávarafurða. Vefurinn er kostaður og vistaður af framkvæmdastjórn Evrópusambandsins en unnin í samvinnu framkvæmdastjórnarinnar og íslenska sjávarútvegsráðuneytisins. Hann er aðgengilegur á vef Evrópusambandsins og í gegnum heimasíðu sjávarútvegsráðuneytisins. Slóðin er:

http://europa.eu.int/comm/fisheries/doc_et_publ/factsheets/facts/en/ecolabel_definition.htm