Árstíðir Vivaldis í Skálholti

Bachsveitin flytur Árstíðirnar fjórar eftir Antonio Vivaldi á tónleikum í Skálholti í kvöld kl. 20 en verkið heyrist nú í annað sinn á Sumartónleikum í Skálholti. Árstíðirnar eru meðal vinsælustu verka tónbókmenntanna og voru síðast fluttar á Sumartónleikunum árið 1990. Fiðluleikarinn Kati Debretzeni leiðir Bachsveitina og er jafnframt í einleikshlutverki.

Að loknum tónleikunum fer fram þriðja Brynjólfsvaka Sumartónleikanna undir yfirskriftinni Skálholt á barokktímanum í Oddsstofu í Skálholtsbúðum. Að þessu sinni mun Njáll Sigurðsson fjalla um forn kirkjusönghandrit. Að því loknu verður efnt til kynningarfundar um stofnun Hollvinafélags Sumartónleika í Skálholti.